श्रीहरिदास

श्रीहरिदास गाऊँ श्रीहरिदास गाऊँ।
श्रीहरिदास नाम गुन गाइ, विपुल प्रेम पाऊँ।।1।।
श्रीहरिदास नाम गुन रूप तन राऊँ।
श्रीहरिदास प्रानिन के प्रानहिं जिवाऊँ।।2।।
श्रीहरिदास लैना श्रीहरिदास दैना।
श्रीहरिदास भजै भैया कछु भैना।।3।।
श्रीहरिदास द्यौसौ, श्रीहरिदास रात्यौ।
श्रीहरिदास व्यौहार श्रीहरिदास बात्यौ।।4।।
श्रीहरिदास बल बुद्धि कुल जाति पाँती।
श्रीहरिदास भेंटत सीतल भई छाती।।5।।
श्रीहरिदास अंग बिनु संग तजि सांतौ।
श्रीहरिदास हिलगि बिनु हेत करि हाँतौ।।6।।
श्रीहरिदास प्रेम बिन नेम न सुहातौ।
श्रीहरिदास हित बोलत मिलत महल को नातौ।।7।।
श्रीहरिदास नाम रूचि श्रीहरिदास नाम सुचि।
श्रीहरिदास नाम लिये जाहिं दुख दोष मुचि।।8।।
श्रीहरिदास कर्मैं श्रीहरिदास धर्मैं।
श्रीहरिदास नाम बेधि लै मन मर्मैं।।9।।
श्रीहरिदास ग्यानैं श्रीहरिदास ध्यानैं।
श्रीहरिदास नाम करि कोटि अस्नानैं।।10।।
श्रीहरिदास नाम मेरे मंत्र माला।
श्रीहरिदास नाम मुद्रा तिलक भाला।।11।।
श्रीहरिदास सेवा श्रीहरिदास पूजा।
श्रीहरिदास भजन बिनु भाव नहीं दूजा।।12।।
श्रीहरिदास भक्ति रति श्रीहरिदास परम गति।
श्रीहरिदास जसु गावत भई सुदृढ़ मति।।13।।
श्रीहरिदास ब्रजरीति श्रीहरिदास रसरीति।
श्रीहरिदास नाम लिये सकल साधन जीति।।14।।
श्रीहरिदास निज दरस श्रीहरिदास रस परस।
श्रीहरिदास सुख देत श्रीहरिदास हित हेत।।15।।
अनन्य श्रीस्वामी हरिदास निज दास।
श्रीवर बिहारिनदास विलसत विलास।।16।।